ILOILO CITY – Ginpasiguro sang Japan nga wala sang matuga nga halit ang plano nga pag-release sang treated radioactive water nagikan sa Fukushima nuclear plant padulong sa baybay.
Sa ginpatigayon nga pagsinapol sang foreign ministers nagikan sa Association of Southeast Asian Nation member countries, China, kag South Korea may kaangtanan sa mga concerns nga ginpalab-ot sang kaiping nga mga pungsod.
Suno kay Bombo Josel Palma, international correspodent direkta sa Japan, ginklaro ni Japanese Foreign Minister Yoshimasa Hayashi nga pagwaon sang Japan ang tubig pinaagi sa pagsunod sa international standards kag customs.
Wala sang participant sa pagsinapol nga hugot nga nagpamalabag sa plano magluwas lamang sa China nga sulit-sulit nga naga-enganyo sa Japan nga indi na pagdayunon ang discharge.
Ginpa-athag ni Hayashi nga ang plano ang nagsunod sa assessment report sang International Atomic Energy Agency sang nagligad nga semana kag ang pahayag sang China ang wala sang scientific grounds.
Una na nga gingamit sang Chinese top diplomat nga si Wang Yi ang term nga “contaminated water” sa baylo nga “treated water.”
Ang Japanese government upod sa Tokyo Electric Power Company Holdings Inc. nga amo ang operator sang planta ang nagaplano nga ipatuman ang discharge sa summer.
Sa katapusan nga bahin sang Hulyo, natalana nga magpakigkita si Prime Minister Fumio Kishida sa pinuno sang Japan’s national fisheries federation agud nga mapa-athag ang plano sang gobyerno.
Nahibaluan nga ang grupo sang mga manugpangisda ang nagakabalaka man sa nasambit nga plano.
