ILOILO CITY – Patay ang 37 ka mga tawo sa natabo nga stampede sa isa ka military stadium sa Republic of Congo kasunod sang pagpadulong sang mga tawo sa isa ka recruitment appeal sang Lunes, adlaw na sang Martes sa Pilipinas.
Gin-anunsiyo sang Congolese Armed Forces Command nga ang tanan nga recruitment operations ang gin-suspend sa Brazzaville kasunod sang trahedya.
Suno sa public prosecutor nga si Oko Ngakala, may patigayunon nga imbestigasyon kag hibaluon kun ngaa nga nagapadayon ang event apisar nga tungang gab-i na.
Sa pahayag sang isa ka bataon nga graduate nga nakaluwas sa suffocation, nagsugod siya sa pagpila sa Ornado stadium sang Lunes sang aga.
Dugang pa niya, ginpahayag sang mga organizers nga katapusan na nga adlaw sang recruitment gani, nagdesisyon sila nga maghulat tubtob sa kagab-ihon agud nga makaparehistro.
Ang iban sa ila ang wala na nakahulat pa kag nagdinaguso nga nagresulta sa stampede.
Humalin sang nagliligad nga mga semana, madamo na sang nagpila sa gwa sang recruitment centers sa tagsa ka adlaw sa katuyuan nga makasulod sa army, nga isa sa pila lamang ka mga institusyon nga naga-offer sang trabaho sa Republic of Congo.
Nagadangat sa 700 ka mga tawo ang nagapila sa tagsa ka adlaw apisar nga 1, 500 lamang ka mga slots ang available.
Sa Republic of Congo nga may 5.61 million ka mga tawo, yara sa 42% ang youth unemployment suno sa World Bank statistics.
Apisar nga isa ini ka oil-producing nation, lapnagon ang kapigaduhon kag 15% lamang sa mga tawo sa rural areas ang may access sa kuryente.
