Ginklaro sang Department of Labor and Employment (DOLE) nga mahimo nga indi maka-report sa trabaho ang mga empleyado agud nga malikawan ang tuman nga init — apang, wala man sang batunon nga sweldo sa adlaw sang pag-absent.
Suno kay Labor Secretary Bienvenido Laguesma, sandig sa nakabutang sa DOLE Advisory No. 17-2022, may option gid ang employee nga mag-absent ilabi na kun indi na safe sa ikaayong lawas ang tuman nga init.
Nalakip ini sa ginatawag nga “imminent danger” nga mahimo dala sang natural disturbances kaangay sang El Niño.
Kun “imminent danger” ang rason sang empleyado sa pagpaiway sa trabaho, wala dapat sang idagdag nga administrative sanction suno sa tiglikom.
Apang sa amo man nga advisory sang DOLE, nakasaad nga kun indi mag-trabaho ang empleyado bangud sa sini nga rason, indi man ini makabaton sang regular pay — MAGLUWAS LANG kun may yara sang polisa, practice, ukon collective bargaining agreement ang kumpaniya nga magahatag sang payment sa amo nga adlaw, ukon halimbawa, pasugtan ang employee nga gamiton ang iya nga natipon nga leave credits.
Panugyan pa sang tiglikom, dapat nga pahibaluon sang empleyado ang iya nga employer agud nga malikawan ang indi pagpangpanay sa opisina.
Sa pihak nga bahin, gin-anunsyo naman sang Philippine Health Insurance Corp. (PhilHealth) nga mahimo maka-avail sang benepisyo ang mga trabahador nga ma-ospital bangud sa heat stroke ukon heat exhaustion.
Nagalab-ot ang benefit package sa P6,500 kun sa diin nalakip ang hospital fees kag professional fees.#
