ILOILO CITY- Ginahulat pa ni Iloilo City Mayor Jerry Trenas ang sabat sang Bureau of Immigration sa panawagan sini nga bantayan ang presensya sang mga foreign nationals kag indi pagtugutan ang mga dumuluong nga magtinir sang mas malawig pa sa kun ano lang ang ginatugutan sa ila.
Ini sa tunga sang mainit nga isyu nga naga-involve sang mga Chinese nationals nga nagaistar sa mga dalagko nga subdivisions sa syudad.
Sa interview sang Bombo Radyo kay Mayor Trenas, iya ginpahayag nga indi lang Chinese nationals ang dapat nga tutukan sang Bureau of Immigration kundi ang iban man nga lahi nga mahimo involved sa iligal nga buluhaton kaangay sang gambling.
May kaangtanan diri, ginsiling sang alkalde nga ginatapos na niya ang iga-isyu nga Executive Order nga magamando sang pagdumili sang ano man nga operasyon sang Philippine Offshore Gaming Operators kag iban pa nga sugal ukon kaangay nga aktibidad.
Dugang sang alkalde, sa bahin sang Iloilo City Council, may ipasar man nga ordinansa nga pareho man ang katuyuan.
