ANTIQUE – Pilason ang apat ka mga sakay sang delivery truck matapos nahulog sa pil-as sa Brgy. Apdo, Hamtic Antique.
Sa interview sang Bombo Radyo kay Police Major Horizon Villanueva, hepe sang Hamtic Municipal Police Station, iya ginpahayag, kargado ang truck sang mga ulutanon kag mga prutas.
Suno kay Villanueva, wala nakontrol sang driver ang iya preno bangud liku-on kag kurbadahon ang dalan sang naglabay ini sa rason nga nakaliko ini sa wala nga bahin sang dalan kag nahulog sa pil-as.
Bangud sini, nagkulob gid ang truck sa ginabanta pito ka metros nga kadalumon sang pil-as.
Nahibaluan nga nakalumpat pa ang duha ka mga sakay sini samtang nagahagunos na nga mahulog ang truck sa pil-as.
Ginpahayag sang natungdan nga pilason ang duha nga nakalumpat samtang natam-an gid ang driver kag ang isa ka pahenante nga sakay sini.
Sa subong, ginadapatan sang nagaka-igo nga pagbulong ang mga ini sa ospital.
