Nagsabat ang bag-o nga foreign minister sang Taiwan nga dapat magmato-mato na lamang sila kag saligan ang ila kaugalingon nga isla nga maprotektahan ang ila kaugalingon samtang nga nagataas ang tensyon sini batok sa China.
Ginpahayag ini ni Taiwanese foreign minister Lin Chia-lung matapos nga nagguwa ang interview kay anay US President kag subong Republican presidential candidate Donald Trump kun sa diin ginpahayag sini nga dapat magbayad ang Taiwan sa Estados Unidos sang Amerika bangud sa depensa nga ila ginahatag kaangot sa kumplikto sa Beijing.
Suno kay Lin, seryoso ang ila paghangop sa nangin komento ni Trump.
Kaangot diri suno sa iya, ginpasaka na sang Taiwan ang ila military budget kag ginalauman nga magataas pa gid ini sa masunod nga mga tinuig indi lamang para makabakal sang dugang nga mga armas kundi agud ma-establisar man ang mga pagbag-o sa militar.
Nahibaluan nga gina-claim sang China ang Taiwan nga kabahin pa sang ila teritoryo rason nga mas ginapasangkad nila ang ila military presence sa amo nga isla.
Ang Estados Unidos naman ang isa sa pinakadaku nga kaalyado sang Taiwan, kag sang damlag lang, gin-aprubahan sang Biden administration ang multi-billion-dollar military aid package para nga mabatuan sang Taiwan ang China.
Bangud sa nangin komento ni Trump nga dapat magbayad ang Taiwan sa Amerika, una na nga ginpahayag sang analysts nga posible maapektuhan sini ang relasyon sang Washington kag Taipei ilabi na kun si Trump ang magdaog sa November 2024 presidential elections.
