ILOILO CITY- Gin-ako sang Department of Education nga may yara sang nagakatabo nga misalignment sa mga manunudlo.
Sa interview sang Bombo Radyo kay Mr. Leonil Salvilla, spokesperson sang Department of Education-Schools Division of Iloilo, iya ginpahayag nga kalabanan diri amo ang nagatudlo sang Values Education ukon Edukasyon sa Pagpapakatao.
Suno kay Salvilla, apisar nga lain ang specialization sang mga manunudlo, nagakapilitan sila nga magtudlo sa amo nga subject.
Pahayag ni Salvilla, ini bangud nga gamay lang nga mga unibersidad ang nagatanyag sang kurso sa Values Education gani ginakulang man ang mga teachers nga makatudlo sini.
Agud masolusyunan ang indi maayo nga resulta sang misalignment, ginasiguro man sang ahensya nga mapaidalom sa school-based trainings, mentoring kag coaching ang mga manunudlo sa Values Education.
Nahibaluan nga base sa data sang ahensya, 62% gid sa mga manunudlo sa bilog nga pungsod ang nagatudlo sang subject nga indi aligned sa ila specialization.
