Ginguba sang Department of Trade and Industry (DTI) ang malapit 9,900 ka electrical appliances nga nagabalor sang masobra P7.7 million matapos napamatud-an nga substandard.
Ginpangunahan sang Fair Trade Enforcement Bureau (FTEB) sang ahensya ang operasyon sa items nga nagalakip sang electric fans, rice cookers, blenders, kettles, kag washing machines.
Lunsay ini uncertified kag wala nakaagi sa proper testing gani indi safe nga gamiton suno sa ahensya.
Gin-abisuhan man sang DTI ang tanan nga mga consumer ilabi na ang naga-shop para sa regalo kag raffle giveaways subong nga Christmas season nga indi gid magbakal sang items nga wala sang Philippine Standard (PS) mark ukon Import Commodity Clearance (ICC) sticker.
Bisan makabarato pa suno kay Atty. Marimel Porciuncula, OIC director sang DTI-FREB, posible mabutang sa kapahamakan ang pamilya kun substandard ang kaangay nga items bangud basi kun maglupok ini.
Ini nga mga produkto ang una na nga nakumpiskar sang Hunyo matapos nagreklamo ang customer sa iya item nga ginbakal. Sunod nagguwa nga ang ini nga distributor nga naka-base sa Valenzuela ang may yara sang warehouse nga puno sang uncertified home appliances.
Lakip sa penalidad nga ginadagdag sa mga establisemento nga nagakomiter sang kaangay nga sala amo ang cease and desist order kag minimum penalty nga P70,000 base sa nakasaad sa Consumer Act of the Philippines.
Nagapakig-angot man ang DTI sa iban pa nga online shopping platforms kag merchants para masigurado nga naga-post sila sang pictures sang ila produkto nga may yara sang DTI markings. Kun wala sang markings suno sa ahensya, isa na ini ka paandam sa consumers kag dapat man sila nga mangin proactive.
Nahibaluan nga halin sang Abril subong nga tuig, nakadangat na sa P340 million nga balor sang substandard products ang nakumpiskar sang DTI.#
