Ginkumpirma sang Pentagon nga aprubado na sang State Department sang Estados Unidos sang Amerika ang pagbaligya sang spare parts para sa F-16 jets kag radars sa Taiwan nga ginabanta nagabalor sang $385 million ukon P22.56-billion.
Suno sa Defense Security Cooperation Agency sang Pentagon, lakip sa ginbaligya sang US amo ang $320 million ukon P18.75-billion nga spare parts kag support sa F-16 fighters kag Active Electronically Scanned Array Radars kag related equipment.
Gin-aprubahan man sang State Department ang potential sale sa Taiwan sang improved mobile subscriber equipment and support sa ginabanta $65 million ukon P3.80-billion.
Nagpahayag naman ang Taiwanese defense ministry nga posible nga mangin epektibo na ini nga sales sa sulod lamang sang isa ka bulan. Ginalauman man nga ini nga mga equipment ang magabulig maintain sa ila nga mga F-16 kag mapabakod pa ang ila nga defense force.
“Taiwan and the United States will continue to strengthen their security partnership and work together to maintain peace and stability in the Taiwan Strait and the Indo-Pacific region,” kabahin sang statement sang Taiwan Defense Force.
Sang nagligad nga bulan, gin-anunsyo sang US ang potential $2 billion arms sale package (P117.20-billion) sa Taiwan lakip na ang delivery sang advanced air defense missile system nga natilawan man anay sa Ukraine.
Sini nga weekend, magabisita man si Taiwan President Lai Ching-te sa Hawaii kag Guam nga pareho nga puluy-an sang major military bases sang Estados Unidos.
Nahibaluan nga gina-angkon sang China nga ila teritoryo ang Taiwan apang nagapanindugan naman ang Taiwan nga may kaugalingon sila nga demokrasya kag gobyerno. Kaangot diri, ginapataas man sang Bejing ang military pressure batok sa Taiwan lakip na ang duha ka hugnat sang war games subong nga tuig.#
