Lakip ang director-general sang World Health Organization (WHO) nga si Tedros Adhanom Ghebreyesus sa mga tawo nga yara sa Sanaa Airport sa Yemen sang gin-igu ini sang airstrike sang Israel.
Sa iya post sa X, ginsiling sang opisyal nga naigu gid ang air traffic control tower amo man ang departure lounge nga minetros lamang ang kalayuon sa ila nahamtangan. Dugang sini, safe ang iya sitwasyon amo man ang iban nga staff sang UN apang gin-atrasar lang ang ila paghalin.
Ginpahayag man sini nga may pila ka crew members sang eroplano nga napilasan kag may duha ka tawo nga na-report nga napatay sa paluparan.
“As we were about to board our flight from Sanaa… the airport came under aerial bombardment. One of our plane’s crew members was injured,” kabahin sang statement ni Ghebreyesus.
“The air traffic control tower, the departure lounge — just a few meters from where we were — and the runway were damaged. We will need to wait for the damage to the airport to be repaired before we can leave,” dugang sini.
Didto si Tedros sa Yemen bilang kabahin sang misyon nga iduso ang pag-release sa UN staff kag i-assess man ang health and humanitarian situations sa amo nga pungsod.
Ginkumpirma man sang Israel nga gin-igu matuod sang ila air strikes ang international airport sa Sanaa magluwas pa sa duha ka power stations kag mga pantalan nga ginaalegar ginaagyan sang mga hinganiban nga ginapadala sang Iran.
Sang weekend, una na nga nagpaandam si Israeli Prime Minister Benjamin Netanyahu nga pudpudon nila ang mga imprastraktura sang rebelde nga group nga Houthis matapos nga nag-atake man ang amo nga grupo sa Israel.
Ang Houthis amo ang armado nga grupo nga naka-base sa Yemen kag suportado sang Iran.
Sunod man nga ginpasaka sang Israel Defense Forces (IDF) ang alert level sang ila nga air defense systems bilang preparasyon pananglitan magbalos ang Houthi rebels.
