Nangin positibo ang reaksyon sang pila ka mga negosyante nga nagabaligya sang bugas sa Iloilo Terminal Market kasunod sang pagdeklarar sang Department of Agriculture (DA) sang Food Security Emergency sa bugas.
Ini kasunod sang indi mapunggan nga pagtaas sang presyo sang bugas sa merkado.
Sa interview sang Bombo Radyo kay Edward Boco, manogbaligya sang bugas, iya ginpahayag nga maayo ang tikang nga ginpatuman sang gobyerno bangud posible nga makabulig ini sa kadam-an ilabi na sa mga pigado.
Nagalaum man ang natungdan nga magadamo ang iya mga customers kasunod sang pagdeklarar sang Food Security Emergency sa bugas.
Suno kay Boco, nagasalig siya nga magnubo man ang presyo sang bugas nga iya ginabul-an agud nga ibaligya.
Nagapati man ini nga bisan papaano makakaon na ang mga imol nga nagapanghakroy sa presyo sang bugas.
Subong, ginabaligya sini ang iya imported rice sa balor nga P58 per kilo, samtang P54 tubtob P50 per kilo naman ang local rice.
Nahibaluan nga ginbasehan sang National Price Coordinating Council (NPCC) ang data sa Philippine Statistics Authority (PSA) kun sa diin naglab-ot ang rice inflation sa 17.9 percent sang September 2023. Lapaw ini sa upper band sang target sang gobyerno nga 4 percent para sa food inflation
