Temporaryo nga ginpauntat sang Department of Agriculture (DA) ang pag-import sang poultry halin sa apat ka states sa Estados Unidos sang Amerika agud mapunggan ang pagsulod kag paglapta sang bird flu sa Pilipinas.
Base sa Memorandum Order No. 11, nalakip sa import ban ang domestic kag wild birds kag ila nga mga produkto, poultry meat, day-old chicks, eggs kag semen halin sa Illinois, Minnesota, Ohio kag Wisconsin.
Ini nga memo ang kasunod sang mga outbreak sang highly pathogenic avian influenza nga na-report sa US sang nagligad lamang nga Pebrero 3.
Bangud sa mandu ni Agriculture Secretary Francisco Tiu Laurel Jr., awtomatiko nga suspendido ang pag-proseso, pag-evaluate, kag pag-isyu sang sanitary and phytosanitary import clearance para sa nasambit nga mga produkto.
Ginpauntat man kag ginpakumpiskar sa veterinary quarantine officers/inspectors ang poultry deliveries halin sa sini nga American states sa tanan nga major ports of entry.
Antes sini, na-lift na kuntani sang DA ang import ban sa poultry products sa Ohio sang Hunyo 2024 kag Minnesota sang Nobyembre sang amo man nga tuig.
Nahibaluan nga isa ang US sa major suppliers sang meat products sa Pilipinas. Ginauyatan sini ang export market share nga 15.2 percent sang 2024.
