Pilason ang isa ka babaye matapos nga naglapaw sa karsada kag nahulog sa punongan ang ginamaneho sini nga salakyan sa Barangay Pili, Ajuy, Iloilo.
Ang driver amo si Verna Rose Belleza, 32-anyos, kag residente sang Barangay Lanit, Jaro, Iloilo City.
Sa interview sang Bombo Radyo kay Police Senior Master Sergeant Pejie Bunda, imbestigador sang Ajuy Municipal Police Station, iya ginpahayag nga naghalin ang salakyan sa banwa sang Sta. Barbara kag padulong kuntani sa Ajuy sang hinali lang nga napiyungan ini samtang nagamaneho kag nadulaan sang kontrol sa manibela.
Suno kay Bunda, ginhingagaw niya nga likawan ang poste rason nga nakabunggo ini sa gutter kag nag-overshoot sa punongan.
Maswerte man nga nabuligan ini sang mga tawo kag gilayon nga nakagwa sa iya salakyan kag sa maayo na nga kondisyon subong ang amo nga driver.
