Nagapabilin nga ligom-dulom ang otoridad sa identity sang lalaki nga nasapwan nga wala na sang kabuhi kag nagalutaw sa Iloilo River sa Brgy. Concepcion, Iloilo City Proper.
Ang biktima ang ginabanta yara sa 50 tubtob 60-anyos kag may tattoo nga ‘Patumbaya Orig’ sa tiil, may yara man sa iya butkon nga naka-tattoo nga ‘I love you Iren Hellen’, samtang ‘Rowena’ naman sa tuo nga dughan sini kag ginabanta nga 5’2 ang kataason.
Sa interview sang Bombo Radyo kay Police Staff Sergeant Alberto Espinosa, imbestigador sang Iloilo City Police Station 1, iya ginpahayag nga padayon ang ila pagkoordinar sa mga punong barangay sa syudad agud matumod ang identity sang biktima.
Suno kay Espinosa, kinahanglan man sang consent halin sa pamilya sang lalaki agud nga mapaidalom ini sa autopsy test kag matumod ang kabangdanan sang iya nga kamatayon.
Ginpahayag man sini nga mahimo bag-o lang gid nahulog ang lalaki antes nasapwan nga may ginabanta 4 tubtob 5 ka oras nga yara sa dagat.
Sa inisyal man nga pagimbestigar sa lawas sang biktima, nagaguwa nga may pilas ini sa iya agtang kag itsura, apang indi man matumod kon ginlamposan ukon wala bangud posible man ini nga nahulog.
Gintuad naman sang isa ka indibidwal nga nakit-an sini ang biktima kahapon sang gab-i, kon sa diin, nagalakat sa Monica Blumentritt, Iloilo City Proper.
Suno kay Noel Mondejar, ang nakakita sa biktima, wala man sini makilalal-an ang lalaki apang, naobserbahan sini nga nagapakadto-pabalik nga nagalakat.
