Ginakabig ni House Deputy Majority Leader Lorenz Defensor nga isa ka daku nga kadulaan sa bahin sang Kamara ang duha sa ila mga kaupdanan sa prosecution panel nga wala nagdaog sa ila reelection bid.
Ini amo sanday Ako Bicol Representative Jil Bongalon kag General Santos City Representative Loreto Acharon nga ginkabos sa boto sa ila pagpadalagan liwat sa 2025 elections.
Hulyo 30 ginalauman nga maga-umpisa ang impeachment trial batok kay Vice President Sara Duterte sa senado kasunod sang opisyal nga mga preparasyon sa pagbalik sang session sa Kongreso sa Hunyo 2.
Sa interview sang Bombo Radyo sa Ilonggo lawmaker nga myembro man sang prosecution team, ginpahayag sini nga daku gid kuntani ang ikasarang sang duha nga iya ginlaragway nga “very competent and able lawyers.”
“They were very competent and able lawyers who would have done a very good for the prosecution,” suno kay Defensor nga isa man ka abogado.
Gindugang man ni Defensor ang posibilidad nga mangin private prosecutors ang duha ka mamalidha bangud mahimo sila malakip kun iimbitar gihapon sang chief prosecutor sa team bangud wala man ini ginadumilian sa trial.
Sa pihak sini, kumpyansa man si Defensor sa abilidad nanday Congresswoman-elect Leila De Lima kag Congressman-elect Chel Diokno nga kabahin na sang gin-imbitaran ni House Speaker Martin Romualdez nga mangin myembro man sang prosecutors.
“Sila ay mahuhusay na litigators, at kung willing silang tumulong sa impeachment, makakatulong sila sa pagpresenta nang maayos ng aming mga ebidensya,” dugang ni Defensor.
Suno pa sa iya, ang pinaka-importante amo nga mabatian sang mga Pilipino ang kaundan sang ebidensya sang prosecution amo man ang depensa sang bise-presidente. Importante man suno sa iya nga mabaton ang desisyon sang senator-judges.
Nahibaluan nga si De Lima amo ang first nominee sang Mamamayang Liberal ukon ML nga ginalantaw nga makakuha sang isa ka pwesto sa Kongreso.
Nagpaguwa naman sang statement ang Akbayan partylist nga bug-os nga ila suporta sa ila first nominee nga si Diokno nga mangin kabahin sang panel. Ang Akbayan amo ang una nga grupo sa party-list race subong nga eleksyon.#
