Gindakop sang mga operatiba sang Bureau of Immigration (BI) ang tatlo ka Koreano nga napamatud-an nga ilegal nga nagatrabaho sa isa ka pribado nga resort sa sulod sang isa ka subdibisyon sa General Trias, Cavite.
Suno kay BI Intelligence Division Chief Fortunato Manahan Jr. ang tatlo ka foreigner ang ginkilala nga kanday Oh Hyunsik, 51 anyos, Kim Haeyoung, 48 anyos, kag Kim Seoyeong, 45 anyos, kun sa diin nadakpan sang Mayo 22 sa bulig sang Philippine Navy kag Philippine National Police.
Ginpahayag nga ang operasyon ginpatigayon matapos nakabaton ang BI sang impormasyon parte sa presensya sang mga ilegal nga mga foreigner sa lugar.
Base sa record sang BI, ang tatlo ka Koreano wala sang husto nga permit kag visa para magtrabaho sa Pilipinas nga klaro nga paglapas sa mga layi sang immigration.
Ginpasidunggan ni Immigration Commissioner Joel Anthony Viado ang mayo nga koordinasyon sang mga ahensya sa pagdakop sang mga foreigners, kag nagpahanumdom nga ang mga foreigner nga yara sa Pilipinas kinahanglan magsunod sa mga layi sang pungsod.
Ang tatlo subong yara na sa custodial facility sang Bureau of Immigration sa Camp Bagong Diwa, Bicutan, Taguig samtang ginaproseso ang ila deportasyon pabalik sa Korea.
