Nagpa-Bombo ang homeowners sang Decahomes 3, Phase 2 sa Pavia, Iloilo matapos nga ginkudalan ang ila nga gate nga nagaserbi shortcut agud sila nga makaguwa sa subdivision.
Sa interview sang Bombo Radyo kay Manuel Geroche Gabio, isa sa mga homeowners, iya ginpahayag nga Abril 30, 2025 sang ginsiradhan ang gate, kon sa diin, wala sang consultation nga natabo sa ila.
Suno kay Gabio, Abril 29, 2025 sang nakabaton sila sang sulat halin sa management nahanungod sa amo nga tikang.
Para sa natungdan, ang alagyan kontani ang tuman ka accessible sa ila ilabi na nga isa na siya ka senior citizen.
Dako man nga bulig ang gate sa mga estudyante ilabi na nga malayo kon mismo sa alagyan sila mag-agi.
Bangud man sa pagsirado sang gate, mas napamahal ang plete sang mga estudyante kon mag-eskwela.
Kaangot diri, nagpaguwa man sila sang letter nga naga-address sa management kon sa diin, nag-organize man ang management sang meeting sang Mayo 9.
Kasunod sini, nagpromisa nga Mayo 10 mabaton ang response apang wala man natigayon ukon na materialize.
Mayo 17 sang liwat sila nga ginsapol kag Mayo 22 sang liwat nagpadala sang response ang management sa amo nga reklamo.
Nakasaad diri nga indi na mahimo mabuksan ang amo nga gate bangud sa security sang komunidad.
Naghingyo naman ang natungdan nga kontani mapamatian sila kag mahatagan sang temporaryo nga alagyan samtang ginaplano pa kon butangan sang bag-o nga alagyan ukon buksan liwat ang nasambit nga gate.
Dugang sini nga sang 2017 sang na-enganyo ini nga magbakal sang propedad sa amo nga lugar.
Bukas naman ang Bombo Radyo Iloilo sa mangin sabat sang Decahomes 3.
