Ginakabig sang Department of Education (DEPED) Schools Division of Iloilo nga isa ka pagpanghangkat sa ila bahin ang resulta sang 2024 Functional Literacy, Education and Mass Media Survey.
Nakasaad diri nga ang Iloilo ang may pinakamanubo nga functional literacy rate sa Western Visayas.
Sa interview sang Bombo Radyo kay Leonil Salvilla, spokesperson sang Department of Education Schools Division of Iloilo, iya ginpahayag nga ang resulta nagakahulogan nga kinahanglan pa nga i-improve, identify ang gap, kag i-expand ang program agud nga maka-empower sa mga estudyante nga makapanumdom sang malig-on.
Gin-athag sini nga ang edukasyon ang isa ka “share responsibility” sa tunga sang eskwelahan kag sang panimalay.
Dugang ni Salvilla nga antes pa man naguwa ang resulta, may programa na nga daan ang talatapan nga ginhingadlan “Tib-ong Bumulutho” nga nagahanda sa mga estudyante nga ginalakipan sang literacy and numeracy classes.
Lakip sa ginalantaw sang talatapan nga factor amo ang nutrisyon sang mga estudyante nga mahimo makaapekto sa ila nga pagtuon.
Nagpasalig man ang natungdan sang intervention para school feeding program nga lakip man sa budget sang DEPED.
Nahibaluan nga ang Iloilo naka-post sang basic literacy rate nga 88.6% kag functional literacy rate nga 68.4%.
Baliskad ini sa Aklan nga nakarehistro sang pinakamataas nga rate sa rehiyon, nga may 92.1% nga basic literacy kag 73.9% functional literacy.
