Buwas na, Septyembre 7, ang una nga adlaw sang 2025 Philippine Bar Examinations, nga magapadayon sa Septyembre 10 kag 14, 2025.
Isa sa gin-designar sang Korte Suprema nga testing centers amo ang Central Philippine University (CPU) sa Iloilo City.
Kaangot diri, nag-isyu si Mayor Raisa Treñas sang tatlo ka executive orders sa tuyo nga mahagan-hagan ang distractions kag mapasiguro ang kalinong para sa linibo ka law graduates nga magakuha sang national examinations.
Sa idalom sang EO No. 57, ginadumilian ang pagbaligya kag ang pag-inom sang makahulubog nga ilimnon sa sulod sang 500-meter radius sang CPU halin sa tungang gab-i sang Sept. 6, 9, kag 13 tubtub sa 11:59 p.m. sang Sept. 7, 10, kag 14.
Sa EO No. 58, ginamanduan ang mga negosyo nga maglikaw sa paghimo sang mga gahod. Ginhatagan man sang mandu ang mga kontraktor nga suspendiron ang mga construction kag ang maintenance malapit sa unibersidad samtang nga padayon ang pagkuha sang test.
Temporaryo man nga ginadumilian ang mga makatuga sang gahod kaangay sang videoke machines.
Sa pihak nga bahin, may coordinating committee naman nga gintukod pagai sa EO No. 59 kun sa diin siguraduhon ang security, traffic, health, disaster risk management, kag public information.
Ang Chairperson sang 2025 Bar Examinations Committee amo si SC Associate Justice Amy C. Lazaro-Javier.
Anum ka core subjects ang igalakip sa exams.
Sa una nga adlaw, magatutok ang test sa Political and Public International Law kag Commercial and Taxation Laws; Civil Law, Labor Law kag Social Legislation sa Septyembre 10; samtang Criminal Law, Remedial Law, kag Legal and Judicial Ethics with Practical Exercises naman sa katapusan nga adlaw sang pasinawan.#
