Nagpaguwa sang circular letter si Jaro Archbishop Midyphil Billones nga naga-engganyo sa paghimo sang tatlo ka importante nga mga buluhaton kasunod sang mga linog nga nabatyagan sa mga lugar diri sa Panay.

Nakabutang ini sa “Pastoral Appeal for Structural, Mental and Spiritual Integrity in the Midst of Uncertainty” nga gin-isyu sang Oktubre 16, 2025.

Una, ginhingyo sang Arsobispo ang structural integrity assessment sa mga simbahan, parochial schools, kag parish rectories, ilabi na sa daan na nga mga estruktura.

Kun natapos na ang assessment, gina-engganyo ang pagpatigayon sang “attentive review” ilabi na sa mga estruktura sa South District.

Ikaduha, dapat suno sa Archbishop nga tatapon gid ang mental integrity sang tanan paagi sa maayo nga preparasyon sa tion nga may kalamidad.

Lakip diri suno sa iya ang pagbalay sang disaster protocols para sa parishioners kag personnel, pag-edukar sa mga pumuluyo para sa emergency response, pagtumod sang evacuation areas malapit sa parokya ukon sa mga eskwelahan, kag pagpasakop sa regular drills nga gina-conduct sang Municipal ukon City Disaster Risk Reduction and Management Office.

“By equipping our parishioners and personnel with proper knowledge and readiness, we cultivate resilience and reduce unnecessary fear and panic in times of crisis,” kabahin sang pastoral letter.

Ikatatlo, dapat suno kay Billones nga magpangamuyo sang Oratio Imperata, Santo Rosario, kag iban pa nga “helpful prayers as acts of entrustment.” Ini nagapakita suno sa iya sang pagsalig sa gahum sang Ginuo, pagpangayo sang kapatawaran, kag pag-ampo sa pagpalangga kag proteksyon sang Diyos.

“With structural integrity through attentive assessment of our physical buildings, with mental integrity through enhancement of calm preparedness, and with spiritual integrity through prayerful entrustment to God, we hope to rise from the tremors that shake our nation,” suno pa kay Archbishop Billones.

Ginpaguwa ang pastoral letter kasunod sang magnitude 4.0 nga linog nga nagtay-og sa Guimbal sang Oktubre 15 nga nabatyagan sa madamo nga parte sang syudad kag probinsya sang Iloilo. Gin-mensyonar man ang magnitude 2.2 nga linog sang Oktubre 16 sang kaagahon sa banwa sang Ajuy.

“Let the tremors not only trigger fright but also a holistic faith response,” kabahin pa sang circular letter nga naka-address sa lay faithful kag clergy sang Archdiocese of Jaro.#