Ginpasalamatan kag gindayaw ni Iloilo City Mayor Raisa Treñas ang serbisyo nga nahatag ni Police Colonel Kim Legada bilang director sang Iloilo City Police Office (ICPO).
Ginpabutyag ini sang alkalde matapos gin-anunsyo sang Police Regional Office (PRO) VI nga gin-relieve si Legada kag temporaryo nga iga-assign sa regional headquarters bangud sa lapses sa imbestigasyon sa Lamasan case.
Sa interview naman sang Bombo Radyo kay Joy Fantilaga Gorzal, spokesperson ni Mayor Treñas, iya ginpahayag nga ginakilala sang syudad nga sa idalom sang liderato ni Legada, ginpasidunggan ang ICPO bilang back-to-back Best City Police Office.
Ginbalikan man sang alcalde ang mas mabaskog nga kampanya sang ICPO kontra sa droga kun sa diin sa idalom sang pagpamuno ni Legada, malapit 1,00 ka drug operations ang natigayon, masobra 1,300 ka ginaalegar nga durugista ang naaresto, kag masobra P300-million nga balor sang droga ang nakumpiskar.
Sa iya statement, ginpahayag man sang alcalde nga naghingyo siya kay PRO 6 Director Brigadier Gen Josefino Ligan nga ikonsiderar ang bulig kag paggiya ni Legada ilabi na sa palaabuton nga major events sa syudad kaangot sa Dinagyang.
“Naintindihan ko nga leaders come and go, kag kabahin ini sang normal nga dalagan sang serbisyo publiko. Apang sa sini nga tion, ginahambal ko ang akon bug-os nga pagpasalamat sa iya serbisyo para sa Iloilo City. And, I challenge the incoming City Director to be at par or surpass the achievement of PCOL Legada,” kabahin sang statement nga ginpaguwa sang alcalde sang syudad.
Matandaan nga nagpungko si Legada bilang ICPO chief sadtong 2024 tal-os kay Colonel Joeresty Coronica nga subong yara na sa Negros Island Region (NIR).#
