Masobra 116 ka tawo ang napatay dala na ang mga kabataan sa nagapadayon nga protesta sang mga tawo sa Iran batok sa ila nga gobyerno.
Base sa report nga ginpaguwa sang Human Rights Activists Agency masobra duwa ka libo na ang ginpang-aresto.
Nagsugod ang ini nga mga protesta halin sang Disyembre 2025 bangud sa nagataas nga inflation kag ang paghina sang balor sang kwarta rason sang panawagan batok sa gobyerno sang pungsod.
Naka-experiensya man sang lapnagon nga pagkadula sang internet blackout ang iban nga bahin sang lugar sa masobra 60 ka oras.
Suno sa Supreme Leader sang theocratic government sa Tehran nga si Ayatollah Ali Khamene nagamit sang teargas kag bala ang mga opisyal nga nagapamuno agud buwagon ang mga nagaprotesta.
Suno pa sa ila nga handa ang mga ini nga hatagan sang solusyon ang problema sang pungsod apang indi lang ini magprotesta nga suno sa ila ginasuportahan man sang mga pungsod nga Estados Unidos kag Israel.
Nahibaluan nga naghatag sang pahayag si Israeli Prime Minister Benjamin Netanyahu nga hugot sang mga ini nga ginabantayan ang nagakatabo sa Israel.
Dugang pa diri, liwat-liwat man nga nagpaandam si US President Donald Trump sa nagapatigayon sang bayolente nga mga tikang agud pauntaton ang mga nagaprotesta kag handa nga magbulig ang Estados Unidos kun kinahanglan.
Samtang, nagpaandam man ang Tehran batok sa mga pungsod nga nagapasilabot sa ila.
Suno kay Mohammad Bagher Qalibaf, spokesperson sang Iranian parliament, ang militar sang US kag ang Israel ang mangin lehitimo nga target kung mag-atake ang Amerika sa Iran.
