Nag-abot na si President Ferdinand Marcos Jr. sa United Arab Emirates para magtambong sa Abu Dhabi Sustainability Week kag agud magpirma sang importante nga mga kasugtanan.

“President Ferdinand R. Marcos Jr. arrived in the capital city of Abu Dhabi to begin his Working Visit to the United Arab Emirates (UAE) on January 12, 2026 (11:09 PM local time),” suno sa Presidential Communications Office (PCO).

Gin-abi-abi siya ni His Excellency Saeed Bin Mubarak Al Hajeri, Minister of State sa UAE Ministry of Foreign Affairs (MoFA).

Ginalauman suno sa Palasyo nga mapirmahan sang Pilipinas kag UAE ang pila ka mga importante nga kasugtanan lakip na ang Comprehensive Economic Partnership Agreement (CEPA). Paagi sa CEPA, mahimo mapasangkad ang kooperasyon sang duha ka pungsod sa trade, serbisyo, kag investments.

Mahimo man sini mahatagan sang dugang nga access ang Pilipinas sa Gulf Cooperation Council (GCC) market nga nagalakip sang Bahrain, Kuwait, Oman, Qatar, kag Saudi Arabia.

Kumpyansa man si Marcos nga sa iya pagbalik, dala niya ang mayo nga balita para sa benepisyo sang mga Pilipino diri sa Pilipinas, kag sang 900,000 na mga Pinoy nga yara sa amo nga Gulf country.

Magluwas sa CEPA, pirmahan man ang Memorandum of Understanding (MOU) on Defense Cooperation sa tunga sang Manila kag Abu Dhabi. Amo ini ang magapabaskog sang defense cooperation sa tunga sang duha ka pungsod lakip na ang joint training, exchange of officers, kag information sharing.

Suno kay Philippine Ambassador to the UAE Alfonso Ver, may yara sang highly developed defense capabilities ang UAE nga mahimo mabenepisyuhan sang Pilipinas.

Namensyonar man nga lantawon man sang duha ka pungsod ang kooperasyon sa patag sang artificial intelligence, renewable energy, kag digital economy.

Ang byahe sang presidente sa Middle East ang kasunod mismo sang imbitasyon ni UAE President His Highness Sheikh Mohamed bin Zayed Al Nahyan.

Gindesignar naman bilang mga caretakers sang gobyerno sanday Executive Secretary Ralph Recto, Agrarian Reform Secretary Conrado Estrella, kag Social Welfare and Development Secretary Rex Gatchalian samtang yara sa luwas sang pungsod ang punong ehekutibo.#

RELATED ARTICLESMORE FROM AUTHOR