Indi lang perwisyo kundi daku nga trauma ang gindala ni Bagyo Basyang sa isa ka pamilya nga namatyan sang himata sa Brgy. Bugo, Cagayan de Oro City.
Bangud sang kataason sang tubig-baha nga halos lab-ot na sa liog sang tawo, ginpili sang pamilya ni Kent Kobe Opon nga hakwaton na lang ang lungon sa sulod sang ila balay kag isaylo sa ikaduha nga panalgan.
Nag-umpisa sa pagsaka ang tubig-baha sang alas dos kaina sang kaagahon.
“Typhoon Basyang had left us with not just chaos and trauma but everything in between. One moment, we lost a loved one. In another, we lost our home. Grief and disaster came together, leaving us with pain that words can barely hold,” kabahin sang iya nga post.
Naghubas na ang tubig subong apang napuno sang lutak ang mga bulak kag ang iban pa nila nga mga kagamitan.
Nahibaluan nga sa bilog nga Northern Mindanao, lima ka mga tawo ang na-rekord nga napatay kag linibo ang napilitan nga magbiya anay sa ila nga mga balay bangud sa bagyo.
Sa Cagayan de Oro, apat ka mga myembro sang isa ka pamilya (mag-asawa kag duha ka hinablos) ang nagtaliwan bangud sa landslide.#
