Temporaryo nga gintapalan sang aspalto ang mga buho-buho nga nahamtang sa karon sa Jalandoni Bridge nga nagakonekta sa Brgy. Nabitasan, La Paz kag City Proper kon sa diin nagagwa na ang kabilya sini.
Nalakip ini sa ginpalab-ot na ni Mayor Raisa Treñas kay Sec. Vince Dizon kun sa diin nagahingyo ang alkalde sang urgent national government assistance para sa inspection, structural evaluation kag rehabilitation sang taytay.
Nahibaluan nga humalin sang pag-obra sini sang tuig 2000, wala pa ini nakaagi sang structural upgrade kag wala man ini na-turnover sang DPWH sa Iloilo City Government.
Ginkumpirma naman ni Sec. Dizon nga nabaton na niya ang letter halin sa Iloilo City Government kag tinguhaan nga mahatagan sang lihok ang nasambit nga problema.
Sa matandaan nga ginpa-Bombo ang nasambit nga taytay sang nagligad nga bulan bangud nga dako ang huol nga dala sini sa mga motorista.
Sa interview sang Bombo Radyo kay Bongbong Guevara, tricycle driver, iya ginpahayag nga nangin mas maayo na ang ila pag-agi sa lugar bangud nga wala na sang buho-buho kag indi na maundag para sa ila kag sa ila mga pasahero.
Ginapasalamatan man sini ang Iloilo City Government sa lihok nga gin-obra apang nagahingyo man sila nga kuntani makay-o na gid sang permanente.
Reported by: Bombo Ronalyn Salvadico
