Ginpanawagan ni Iloilo 4th district Board Member Rolando Distura sa mga Ilonggo ang pagpatukod sang rain water harvesting system.
Sa iya privilege speech sa session sang Sangguniang Panlalawigan kahapon nga adlaw, Abril 28, ginpahayag niya nga importante nga may yara sang ma-stock nga tubig ang probinsya sa tion nga nagaulan bangud nga mapuslan gid ini sa tion naman sang tig-ilinit.
Gin-engganyo niya ang tagsa ka Local Government Unit nga para himuon ini nga tikang kasunod man sang paandam sang state weather Bureau sa possible pagsulod na sang El Nino sa masunod nga mga binulan.
Sa interview sang Bombo Radyo kay Board Member Distura, iya ginpahayag nga may ara naman siya sang ginduso nga ordinansa nahanungod sa nasambit nga pasilidad agud mas mapasangkad ang nasambit nga panawagan.
Pamaagi sini, i-require man ang mga pampubliko nga mga establisyamento kaangay sang eskwelahan kag iban nga government infrastructure nga magtukod sang rainwater harvesting system.
Dugang pa ni Distura, importante ini nga inisyatibo agud indi man matam-an ang publiko sa tion nga tuman na gid ka init ang panahon.
