Na-recover ang minilyon ka pesos nga balor sang iligal nga droga sa sunod-sunod nga mga drug buy bust operations sang kapulisan sa probinsya sang Iloilo.
Sa Purok 1, Brgy. Botongon, Estancia, Iloilo, lima ang nadakpan kahapon, Hunyo 5, kun sa diin isa ang high value individual kag apat ang street level individuals.
Nakuha sa ila paghinakop ang 403 grams sang ginapasuni shabu nga may standard drug price nga P2.74-million.
Samtang, sa Brgy. Cato-ogan, Pototan, Iloilo naman subong nga hapon, arestado man ang isa ka 28-anyos nga lalaki nga gina-monitor sang awtoridad halin pa sang nagligad nga tuig.
Nagadangat sa P1.02-million ang balor sang ginapasuni shabu ang na-recover.
Nahibaluan nga napreso na sang tatlo ka tuig ang suspek bangud man sang ginapahayag nga kaangtanan sini sa iligal nga droga apang nakagwa siya sang 2021.
Nagaguwa sa imbestigasyon nga nagabaligya ini sang illegal drugs sa Pototan amo man sa New Lucena kag Lambunao.
Magapangatubang ang nagkaladakpan sang mga panumbungon nga paglapas sa Republic Act 9165 ukon ang Comprehensive Dangerous Drugs Act of 2002.#
