Ginpa-Bombo sang pila ka pumuluyo sang Barangay San Pedro, Molo, Iloilo City ang listahanay sang Assistance to Individuals in Crisis Situation (AICS) matapos nga may mga residente nga nagpasa sang mga kinahanglanon nga dokumento apang wala madala ang ila pangalan sa listahan sang mga benepisyaryo.
Sa interview sang Bombo Radyo kay Anabelle Casas, isa sa mga residente nga nagpa-Bombo, iya ginpahayag nga nagpasa siya sang valid ID bilang kabahin sang proseso apang nakibot siya sang mahibaluan nga wala gali nalakip ang iya ngalan sa listahan.
Dugang pa niya, may mga indibidwal man nga nalista na sang nagligad apang subong nadula na sa rekord.
Suno kay Casas, ginapaabot sang pila ka pamilya nga kwarta ang ila mabaton agud magamit sa iban nga kinahanglanon pareho sang pagbakal sang bulong nga pang-maintenance, apang bugas lamang ang nahatag nga bulig.
Sa pihak nga bahin, nagpakigbahin man sang iya eksperyensya si Marilyn Guigoyon, isa ka tumandok sang San Pedro nga nagsaylo na sa Kalibo.
Suno sa iya, wala gid siya naka-avail sang mga ayuda halin sa nasyonal nga gobyerno bisan pa nga nagapangayo siya sang impormasyon parte sini.
Suno sa iya, kada magpamangkot siya, ang sabat sa iya amo nga indi siya mahimo nga madala sa mga benepisyaryo.
PAHAYAG SANG BARANGAY OFFICIALS
Naghingyo naman si San Pedro, Molo Barangay Kagawad Romar Martirez nga kun mahimo, i-hold anay ang releasing sang AICS nga natalana sa Hulyo 28 agud ma-review ang listahan kag masiguro nga patas ang paghatag sang bulig sa mga kwalipikado nga residente.
Suno kay Martirez, may mga report nga nagaguwa nga may tatlo ka miyembro sang isa ka pamilya nga nalakip sa listahan.
Suno sa iya, mas maayo kuntani nga ginlibot anay sang mga natungdan ang bug-os nga barangay kaupod ang mga opisyal sang barangay agud ma-assess sang maayo ang sitwasyon sang kada panimalay kag masiguro nga isa lamang ka miyembro sa kada pamilya ang makabenepisyo.
Ginpahayag man ni Martirez nga wala nag-agi sa barangay ang proseso sang listahanay bangud nga natabuan nga yara siya kag si Punong Barangay Karl John Lapascua sa Manila para magtambong sa isa ka aktibidad sang gobyerno.
Suno sa kagawad, antes sila maghalin, ginmunuhan siya ni Punong Barangay Lapascua nga maghatag sang listahan sang 15 ka indibidwal nga iya nakita nga nagakabagay sa kategorya sang mga indigent residents.
Apang nakibot sila sang mahibaluan nga wala madala sa opisyal nga listahan ang mga ngalan nga ila ginrekomendar.
Dugang pa niya, base sa ila nahibaluan, indi barangay official ang nangin responsable sa paglista sang mga aplikante kundi isa ka job hire sang City Hall.
Sa pihak naman nga bahin, nagpahayag man sang iya kabalaka si Barangay Kagawad Reynan Alvarado matapos mahibaluan nga may nagaluntad nga listahanay para sa ayuda bisan wala siya sang kahibalo sini.
Suno kay Alvarado, may mga residente sa ila sitio nga kwalipikado kuntani nga makabenepisyo sang programa, apang sang magkadto sila sa barangay hall para magsumiter sang mga dokumento, wala sang opisyal nga nagabaton sang ila mga papeles.
Mas natingala pa ini sang may nagpahibalo sa iya nga ang mga dokumento ginapasumiter sa balay sang isa ka indibidwal nga ginakilala lamang sa alyas nga Tweet.
Sa sini nga tion, ginapaabot pa ang opisyal nga sabat sang mga responsable sa implementasyon sang programa agud mahatagan sang kasanag ang mga isyu kag reklamo nga ginpalab-ot sang mga residente sang amo nga barangay.#
