Gina-agda ni 4th District Board Member Rolando Distura ang publiko nga mag-enroll sa Interruptible Load Program ukon ILP.
Ini agud mabuligan nga mapahagan-hagan ang epekto sang power interruptions sa Iloilo.
Sa interview sang Bombo Radyo kay Distura, iya ginpahayag nga na-discuss na ang iya ginpasar nga resolusyon sa meeting kaupod si Governor Arthur Defensor Jr. amo man sa mga energy sector.
Ginpahayag ni Distura nga na-submit na ang resolusyon sa mga Energy Efficiency and Conservation Officers sa kada banwa, kag ginapaabot na lang nga ma-inform sang mga ini ang mga establishmento nga kwalipikado nga maka-enroll sa ILP.
Nahibaluan nga paagi sa ILP, sa tion sang peak hours ukon peak demand, mahimo nga paandaron sang mga establishmento ang ila kaugalingon nga generators agud indi na magkuha sang kuryente halin sa grid para sa ila operasyon.
Paagi sini, mas madamo nga kuryente ang mahimo nga magamit sang mga panimalay kag magagmay nga establishmento.
Para naman sa mga establishmento nga maga-enroll, may mga kasugtanan nga pagasundon kaupod ang Energy Regulatory Commission ukon ERC kag Department of Energy ukon DOE, kag posible man nga makabaton sila sang mga benepisyo pareho sang discounts kag iban pa nga incentives.
