Natalana nga maga-deliver sang iya ikaduha nga State of the City Address (SOCA) si Iloilo City Mayor Raisa Treñas subong nga adlaw, Oktubre 26, kun sa diin iya i-highlight ang mga programa kag accomplishment sang iya administrasyon.
May tig-ulo nga “Ilonggo: Sentro sang Progreso kag Serbisyo,” ipakita sa SOCA kon paano ang mga programa sa idalom sang Rise-To-Action Framework nagabulig sa mga pumuluyo kag nagasuporta sa pag-uswag sang Iloilo City.
Lakip sa mga programa nga ipresentar ang mga inisyatibo para sa palangabuhian kag trabaho, social services, ikaayong-lawas, edukasyon, palibot, peace and order, imprastraktura, kag iban pa nga sektor.
I-report man ni Mayor Treñas ang pagpalapad sang Rise-To-Action Framework halin sa 42 pakadto sa 45 ka programa. Ginpabaskog pa gid ini paagi sa political will, kapisan, kag suporta sang pumuluyo agud masabat ang nagkalain-lain nga kinahanglanon sang mga komunidad.
Ang mga award kag pagkilala nga nabaton sang syudad nagapakita sang mga resulta sang sini nga mga inisyatibo.
Apang, para sa alkalde, ang mas importante nga kadalag-an amo ang kaayuhan nga naagom sang mga Ilonggo paagi sa mas maayo nga serbisyo kag mas madamo nga oportunidad.
Paagi sa SOCA, iga-share ni Mayor Treñas ang progreso sang iya administrasyon kag ang mga plano sini para sa mas maayo, inklusibo, kag mas mauswagon nga Iloilo City—isa ka syudad nga ang mga benepisyo sang pag-uswag mabatyagan sang mga Ilonggo.#
