Padayon nga ginamonitor sang Philippine Atmospheric, Geophysical and Astronomical Services Administration (PAGASA) ang isa ka low pressure area (LPA) sa sulod sang Philippine Area of Responsibility (PAR) kag ang isa ka bagyo sa guwa sang monitoring area sang Pilipinas nga nangin isa na ka super typhoon.
Sa pinakaulihi nga weather update, ulihi nga nakit-an ang LPA sa kalayuon nga 605 km nasidlangan sang Borongan City, Eastern Samar.
Suno sa weather bureau, posible nga indi ini mag-develop sa tropical depression sa masunod nga 24 oras.
Sa pihak nga bahin, ulihi nga nakit-an si Super Typhoon In-Fa sa kalayuon nga 2,970 km nasidlangan sang Northern Luzon.
Dala sini ang kabaskugon nga 185 km/h kag pagmadlos nga 230 km/h.
Nagahulag ang bagyo sa direksyon nga pa-nakatundan-naaminhan nakatundan sa kadasigon nga 30 km/h.
Ginapanawagan sang weather bureau ang publiko nga padayon nga mag-monitor sang opisyal nga weather bulletins kag mga advisory agud makakuha sang pinakabag-o nga impormasyon kaangot sa duha ka weather systems.
Una naman nga gin-identify sang ahensya ang northeast monsoon, shear line, kag Intertropical Convergence Zone (ITCZ) nga mayor nga mga weather systems nga makaapekto sa pungsod.
Ginapaabot ang lapta-lapta nga pag-ulan kag thunderstorms sa mga parte sang Luzon, Visayas kag Mindanao; samtang sa Metro Manila naman kag iban nga areas, gina-forecast ang isolated rain showers ukon thunderstorms.#
