Padayon nga ginabantayan sang Bangko Sentral ng Pilipinas (BSP) ang pagnubo sang balor sang peso kontra dolyar kag ang posible nga epekto sini sa Pilipinas.
Madumduman nga sa labing una nga tion sa maragtas sang pungsod, naglab-ot sa record-low nga P64 ang baylo sang peso kontra dolyar sang Oktubre 27.
Suno kay Zeno Abenoja, Deputy Governor sang Monetary and Economic Sector sang Bangko Sentral ng Pilipinas, gina-obserbaran man nila ang epekto sang inflation nga matabo bangud sa gulpyada nga pagtaas ukon pagnubo sang exchange rates.
Ginpahayag ni Abenoja nga luyag sang central bank nga maeksperyensiyahan sang foreign exchange market ang orderly conditions ukon ang matawhay nga paghulag sang peso kontra dolyar agud masolbar ang kinahanglanon sang nagadako nga ekonomiya sang pungsod.
Gindetalye man ni Abenoja ang pila ka mga bagay nga nagasuporta sa foreign exchange market, amo ang international reserves, remittances, kag Business Process Outsourcing (BPO).
Dugang pa niya, ang tanan nga nasambit nga bagay nagapadayon sa pagsuporta sa pagpalig-on sang exchange rate.
Nahibaluan nga kun nagaluya ang balor sang peso, mas naga-kumplikado pa ang sitwasyon sa enerhiya sa Pilipinas bangud nagamahal ang imported goods lakip na ang langis bangud gina-purchase ang langis paagi sa dolyar.
Magluwas diri, bangud man sang pagluya sang peso, may impact man ini sa utang sang Pilipinas, ilabi na nga one-third sang amo nga utang ang naghalin sa foreign creditors ukon mga manugpautang halin sa luwas sang pungsod.
