Naghina na ang Bagyo Emong samtang nagapadayon ini sa paghulag sa katubigan sang Extreme Northern Luzon.
Isa na lamang ini ka tropical depression base sa pinakaulihi nga update sang PAGASA.
Ulihi nga nakita ang sentro sang bagyo sa kalayuon nga 500km sa Northeast sang Itbayat, Batanes.
May dala ini nga kabaskugon sang hangin nga nagalab-ot sa 55km/h malapit sa sentro kag may pagbugso nga nagaabot sa 70km/h.
Nagapadayon sa iya nga direksyon nga North-Northeast ang bagyo sa kasarangan nga kadasigon nga 45km/h.
Samtang wala sang direktang epekto ang Bagyo Emong sa kadam-an nga parte sang Pilipinas, ang southwest monsoon ukon habagat ang magapadayon nga magahatag sang mga pag-ulan sa Luzon kag sa western nga bahin sang Visayas.
Ginalauman nga magapadayon ini sa masunod nga mga adlaw, gani ginapahanumdom ang publiko nga maghalong kag mag-monitor sang mga anunsyo halin sa mga lokal nga otoridad kag PAGASA.
