Nag-surrender ang Tokyo Olympics silver medalist nga si Carlo Paalam sa iya round of 16 match sa men’s 57kg sa World Qualification Tournament sa Busto Arsizio, Italy.
Halos isa ka minuto ang nabilin sa second round sa hampang sang nangindi na ang Pinoy boxer rason sa awtomatiko nga kadalag-an ni Shukur Ovezov sang Turkmenistan.
Antes sini, duha na lang kuntani ka daog ang kinahanglan ni Paalam agud nga maka-qualify para sa Paris Olympics subong nga tuig.
Sa separado sini nga post, ginrason sini ang iya shoulder injury nga naangkon sa third round sang iya split-decision win batok kay Andrey Bonilla sang Mexico sang nagligad nga adlaw.
“As much as it pains me to step away from the ring in this manner, my health and well-being must always come first. I appreciate all of your support and understanding during this challenging time,” pahayag sang 25-anyos nga boksidor.
May tyansa pa si Paalam nga makakuha sang Olympic spot paagi sa 2024 World Boxing OQT 2 sa Mayo.
Bangud sa desisyon sini, duha na lang sa 10 ka Pinoy boxers nga ginpadala sang Association of Boxing Alliances in the Philippines sa Italya ang may tyansa nga makabulsa sang Olympic ticket samtang yara sa amo nga tournament. Ini amo sanday Aira Villegas (women’s 50kg) kag Nesthy Petecio (women’s 57kg) nga lunsay tag-isa ka daog na lang ang kinahanglan para makaabanse na sa Olympiada sa France. ##
