Nagpangayo sang pasaylo ang self-proclaimed former rebel nga si Jeffrey “Ka Eric” Celiz bangud sala ang iya nauna nga ginpaguwa nga impormasyon kaangot sa travel funds ni House Speaker Martin Romualdez.
Si Celiz ang naga-serbe nga host sa isa ka programa kag may isa ka episode kun sa diin iya ginpahayag nga may nabaton siya nga text nga naggasto si Romualdez sang P1.8-billion sa iya nga travel expenses sa sulod sang halos isa ka tuig.
Sa hearing naman sang House Committee on Legislative Franchises, ginpamangkot ni Surigao del Sur Rep. Johnny Pimentel si Celiz kun akuon niya nga sala ang iya ginpangwaragwag nga impormasyon kasunod sang pagklaro sang Kamara nga mas manubo sa P40-milion ang actual travel budget sang house speaker.
Sa financial report halin sa Office of the Secretary-General, nakasaad nga ang kabug-usan nga budget sang Kamara para sa travel expenses ang yara lamang sa P39.6 million kun sa diin P4.34 million diri ang naggasto ni Romualdez sa mga byahe sa luwas sang pungsod.
“I would repeat my answer to the question of Congressman [David] Suarez earlier: do we take responsibility for that inadvertence and the failure to conduct proper vetting of the source and information? Yes, and we would repeat this… And if we need to repeat our appeal of understanding, Congressman [Aurelio] Gonzales, sir, at Mr. Chairman, regarding to what happened where the integrity of Speaker Martin Romualdez and of Congress as an institution was affected, I take full responsibility in behalf of the program’s anchor and in my personal capacity, and even from the station, to take responsibility,” pahayag ni Celiz sa atubang sang panel.
Madugay man antes nga mapilit sang mga mamalidha si Celiz nga hingadlan kun sin-o ang iya source sa amo nga impormasyon.
Ginsaad pa sini ang Sotto law kun sa diin protektado ang mga journalists kag indi mapilit nga hingadlan ang ila nga sources sa sensitibo nga mga impormasyon.
Apang sang ulihi, nag-ako man ini nga naga-trabaho sa Senado ang tawo nga naghatag sa iya sang amo nga impormasyon.
Magapadala ang House Committee on Legislative Franchises sang transcript sang hearing sa Senado agud nga makasabat ini sa amo nga isyu. #
