ILOILO CITY- Ginkumpirmar sang Philippine Genome Center (PGC) nga may yara na sang community transmission sang tuman ka makalalaton nga Delta variant sang COVID-19 sa pungsod.
Sa interview sang Bombo Radyo sa Dr. Cynthia Palmes Saloma, executive director sang PGC kag isa ka Ilongga nga tumandok sang Molo, Iloilo City, iya ginpahayag nga ang Delta variant ang naangot sa tuman kadasig nga pagtimbuok sang kaso base sa resulta sang ila genome sequencing sang swab samples nga ginkolekta gikan sa COVID-19 patients sang Hunyo kag Hulyo.
Suno kay Dr. Saloma, nakumpirma ang community transmission base sa ila phylogenetic tree sa ginapatigayon nga analysis kon sa diin ginaangot nila ang mga kaso ukon ang relasyon sang mga organismo ukon genes gikan sa common source.
Suno pa kay Saloma, sa subong, ang “branches” sang phylogenetic tree ang mas malaba kag indi nila ma- trace kon sa diin naghalin ang mga branches gani makabig ini nga community transmission.
Gindugang pa ni Saloma nga miembro man sang Technical Working Group on the New Variants sang Department of Health, nga sa National Capital Region kag sa pungsod sa pangkabilugan, may na- detect nga pagtaas sang Delta variant sa positive swab samples nga gin- sequence sang nagligad nga duha ka bulan.
Pahayag niya, sa bilog nga pungsod, singko porsyento sang samples nga gin-sequence sang Hunyo ang may Delta variant, kag pagkasunod nga bulan, nagtimbuok ini sang 48 porsyento.
Magluwas sa NCR, gin-athag ni Saloma nga may yara man sang nakit-an nga pagtimbuok sang kaso sang Delta variant sa Ilocos region, Cagayan Valley, Central Luzon, Calabarzon,Western Visayas, Central Visayas kag Northern Mindanao.
Base naman sa ulihi nga sequencing report sang PGC, ang numero naman sang Lambda variant case nga na-detect sa pungsod ang nagapabilin sa isa.
Santo naman sa data sang PGC, naglab-ot na sa 11,000 samples ang napaidalom sa sequencing apang wala pa ini nakalab-ot sa one percent sang kabug-usan nga COVID-19 cases sa pungsod.
