Aprubado na sang Department of Agriculture (DA) ang importasyon sang 25,000 metriko tonelada sang nagkalain-lain nga frozen fish products.
Base sa Memorandum Order No. 12, nalakip sa iga-import halin sa Marso tubtub sa Mayo 2025 amo ang marlin, salmon, oyster, sardines, scallops, lobster kag octopus.
Suno kay Agriculture Secretary Francisco Tiu Laurel, Jr., tuyo sini nga mapunggan ang pagpanglakaak sang presyo kag masiguro ang pangkabug-usan nga food security sa Pilipinas.
Pahayag pa sang tiglikom, makadugang pa ini sa variety sa mercado ilabi na sa food service industry bangud ang mga isda kag marine species nga sakop sini nga importasyon amo ang mga sahi nga indi mahulik diri sa pungsod.
Ang iban pa gid nga nalakip sa aprubado nga importasyon amo ang Alaskan pollock, barramundi, bluefin tuna, capelin, Chilean sea bass, clams, cobia, cod, croaker, eel, emperor, fish meat, flounder, gindara, grouper, hake, halibut, hamachi, kag hoki.
Yara man ang moonfish, mussels, mullet, oil fish, pangasius, red snapper, scallops, sea bream, silverfish, smelt, soft kag hardshell crabs, squid, swordfish, tuna by-products, kag yellowtail sole.
Sa bahin naman sang volume allocation, ang kada eligible importer ang pagahatagan sang initial allocation nga 28 MT; samtang ang nabilin naman nga volume ang igapain sa “first come, first served basis.”
Ginsigurado man sang tiglikom nga wala ini sang epekto sa local fish industry.
“This should not affect local fishermen and should help in the ease of doing business,” suno kay Tiu Laurel.
