ILOILO CITY – Ginpahayag sang Department of Justice nga ikonsiderar ang overseas trip ni Negros Oriental Representative Arnolfo “Arnie” Teves Jr. bilang ‘flight’ sa tion nga magbalik ini sa Pilipinas.
Suno kay Justice Secretary Jesus Crispin Remulla, ang ‘flight’ ang nagapatimaan nga guilty ang isa ka tawo.
Si Teves ang ginpahanugutan nga magbiya sa pungsod bangud sang personal trip sa Estados Unidos humalin sang Pebrero 28 tubtob Marso 9.
Una na nga ginpahayag ni Remulla nga si Teves ang yara sa isa ka pungsod nga sakop sang Asya.
Ang iya naman nga legal counsel nga si Atty. Ferdinand Topacio ang nagpahayag man nga ang kongresista ang nakulbaan nga magbalik sa pungsod bangud sang security concerns.
Ginpahayag man niya nga wala sang direkta nga ebidensya nga naga-angut kay Teves sa kamatayon ni Negros Oriental Governor Roel Degamo kag nagpanawagan sa otoridad nga lantawon ang tanan nga mga anggulo kag indi lamang magtutok sa isa ka tawo.
Apisar sang pagpasalig nagikan kay Remulla kag sang Philippine National Police nga wala sang may matabo sa iya sa tion nga magpauli sa pungsod, nag-request ini sa House Speaker nga hatagan sang duha ka bulan nga leave of absence bangud sang “very grave threat” sa iya kabuhi kag sa iya pamilya.
Samtang, ginpahayag ni Remulla nga ang Department of Justice ang may ginalantaw nga iban nga ebidensya apisar nga ang mga nakuha nga mga statements ang nagatudlo kay Teves.
Pahayag niya, indi mahimo ang accusatory process nga walang ebidensya.
Kung madumduman, sang Marso 4, ginpatay si Degamo kag ang walo ka iban pa sa sulod mismo sang iya compound sa Pamplona, Negros Oriental.
Ang mga arestado nga suspek ang nagtudlo kay Teves nga amo ang mastermind sa amo nga krimem.
Una naman nga ginpahayag ni Teves nga wala sila sang may makuha nga benepisyo kun ipapatay nila si Degamo.
