Gin-report sang Philippine Coast Guard (PCG) nga ginkuha na sang China ang mga floating barriers nga ila ginbutang sa Bajo de Masinloc ukon sa Scarborough Shoal apang nagapadayon gihapon sa pagpangsunod-sunod ang ila nga mga sakayan sa amo nga teritoryo nga sulod sa exclusive economic zone (EEZ) sang Pilipinas.
Suno sa PCG, nakit-an ang floating barriers sa satellite images sang Huwebes, Pebrero 15, apang ini ang ginkakas sang nag-abot ang barko sang Bureau of Fisheries and Aquatic Resources (BFAR) agud magdul-ong sang suplay sa mga manugpangisda nga mga Pinoy sa amo nga lugar.
Kun matandaan, sang Septyembre 2023, nagbutang ang China Coast Guard (CCG) sang 300-metros ka laba nga floating barrier sa southeast portion sang Bajo de Masinloc agud balabagan ang mga Pinoy nga makapangisda sa shoal.
Ginkakas sang PCG ang amo nga barrier sandig mismo sa mandu ni President Ferdinand Marcos, Jr. bangud isa ini ka maathag nga paglapas sa international law.
Magluwas sa nauna na nga gin-report sang BFAR nga nagagamit ang Vietnamese kag Chinese fishers sang cyanide sa ila pagpangisda, nakapanugid man ang mga manugpangisda nga Pinoy nga ginasundan sila masami sang CCG gamit ang ila nga mga rubber boats.
Nagpahayag naman ang mga Pinoy nga gina-agwanta lamang nila ini bangud kinahanglan nila ang isda para sa ila nga pamilya.
Una na nga ginsiling sang PCG nga kaupod sa BFAR, magapadayon ini sa paghimo sang rotational deployment sa Bajo de Masinloc — indi agud garit-gariton ang China kundi agud nga mapasigurado nga hilway sa katalagman ang mga Pinoy nga manugpangisda samtang yara sila sa tunga sang kalalawran.
Sang nagligad lamang nga semana, matandaan nga ginsapubliko man sang PCG nga may walo ka barko ang China nga nagbalabag kag nagsunod-sunod sa local vessels sa Bajo de Masinloc kadungan sang siyam ka adlaw nga patrolya sang Pilipinas.
Ini nga shoal ang nahamtang sa kalayuon nga 124 nautical miles west sang Zambales kag sulod pa sa 200-nautical mile EEZ sang Pilipinas kag 200-nautical mile Philippine Continental Shelf.#
