Nagapakig-angot ang Iloilo City Veterinary Office sa National Meat Inspection Services agud mas mapadasig ang pagmonitor kag pagdakop sa mga online seller nga nagabaligya sang pork products nga posible halin sa African Swine Fever (ASF) affected areas.
Sa interview sang Bombo Radyo kay Dr. Tomas Forteza, pinuno sang Iloilo City Veterinary Office, iya ginpahayag nga wala sila nagauntat sa pagmonitor agud nga matumod ang mga online seller nga nagabaligya sang amo nga produkto.
Suno kay Forteza, mas nagadamo na subong ang nagabaligya sa online bangud man sa COVID-19 pandemic sa diin limitado ang hulag sang mga tawo.
Pahayag niya, mahimo nga may yara sang manugbaligya nga wala sang ihibalo nga halin sa ASF affected areas ang iya produkto sang baboy nga ginatanyag online.
Nagpasalig man ang Iloilo City Veterinary Office nga maga-appoint sila sang tawo nga responsable sa pagmonitor sang mga negosyo online.
Nahibaluan nga santo sa Provincial Ordinance No. 2021-250, nasaad nga ginaban ang pagsulod sang livestock transport carriers kag hog vans sa probinsya sang Iloilo nga wala sang disinfection certificate kag/ukon African Swine Fever-Free Certificate halin sa point of origin ukon port of exit.
Indi man makasulod sa probinsya ang buhi nga baboy, boar semen, pork kag pork products lakip na ang food items nga may pork nga naghalin ukon ginmanufacture ukon ginproseso sa mga lugar nga apektado sang ASF nga gindeklarar sang Department of Agriculture (DA).
Ang penalidad sa mga magalapas sa ordinansa amo ang mga masunod:
- First violation: P2,000 ukon pagkapareso sa sulod sang lima ka adlaw
- Second violation: P3,500 ukon pagkapreso sang 10 ka adlaw kag
- Third and subsequent violation: P5,000 ukon pagkapreso sang 15 ka adlaw
