Desidido nga magpasaka sang kaso si Iloilo Vice Governor Christine Garin batok sa indibidwal nga nagpost sa social media sang death threat batok sa iya.
Matandaan nga sa Facebook account nga nakapangalan kay certain Reynold Dooma Mayoral , iya ginpahayag nga kun makatyempo lang ini, siya ang mapatay kay Garin.
Sa exclusive interview sang Bombo Radyo kay Iloilo Vice Governor Garin, iya ginpahayag nga gina-imbestigaran na kag ginatrace sang Regional Anti-Cybercrime Unit 6 ang lokasyon ni Mayoral.
Ginpablotter naman sang bise-gobernador si Mayoral sa Guimbal Municipal Police Station.
Suno kay Garin, sa subong, natumod nga nagatrabaho bilang job hire sa Iloilo City Hall ang nagpamahog sa iya kag nagaistar ini sa Barangay Rizal Pala-Pala II, Iloilo City.
Ginpahayag ni Garin nga indi man niya kilala ang nagapamahog sa iya kag wala man siya sang may nakit-an nga rason kun ngaa initan siya bangud wala man siya nagapakigbahin sa mga isyu sa politika.
Gin-ako ni Garin nga batunon niya ang kritisismo sang tanan kun politika ang paga-istoryahan apang kun may mga pagpamahog na sa iya kabuhi, wala siya sang may nakita nga rason nga i-tolerar ini rason nga luyag niya nga mahatagan sang leksyon si Mayoral nga ginapahayag may death threat sa iya.
Panawagan sang bise-gobernador sa publiko, mangin responsable kag maghalong sa tanan nga ginapost sa social media.
Nahibaluan nga sa ikaduha nga post ni certain Mayoral sa iya facebook account, ginpanginwala sini ang akusasyon nga siya ang nagpost sang pagpamahog kay Garin kag nagwarning sa nagahack sang iya account.
Samtang, nagabuligay naman ang Guimbal Municipal Police Station kag Regional Anti-Cybercrime Unit 6 sa pag-imbestigar sa death threat nga ginhaboy batok kay Iloilo Vice Governor Christine Garin.
Sa interview sang Bombo Radyo kay PLt. Nelson Caro, hepe sang Guimbal Municipal Police Station, iya ginpahayag nga nagapakig-angot na sila sa Regional Anti-Cybercrime Unit 6 agud matumod ang matuod nga identity sang nagpost sang pagpamahog sa Facebook.
Suno kay Caro, sa subong, ginahulat nalang nila ang mando ni Garin kun ano nga kaso ang ipasaka kag legal action nga ipatuman batok kay certain Reynold Dooma Mayoral nga amo ang nagpost sang ginapahayag foul nga mga tinaga kag death threat batok kay Vice Governor Garin.
Samtang, bukas naman ang waragwagan sang Bombo Radyo para sa pagpaathag ni Reynold Dooma Mayoral.
