Ginalantaw sang Bangko Sentral ng Pilipinas (BSP) nga magatupa sa 2.2 tubtub sa 3 percent ang inflation rate sang Pilipinas sa Nobyembre.
Suno sa bangko, lakip sa factors nga ginaangot sa posible pagsaka sang inflation rate amo ang pagsaka sa presyo sang ulutanon, isda, kag karne bangud sa indi mayo nga panahon kasunod sang sunod-sunod nga mga bagyo.
Yara man ang mataas nga electricity rates kag petroleum prices kag ang pagluya sang balor sang Philippine peso.
Apang suno sa BSP, ini nga factors ang posible nga ma-offset man sang pagnubo sa presyo sang bugas.
2.3 percent ang inflation rate sang October nga mas mataas sa 1.9% sang Septyembre.
Kasunod ina sang pagsaka sa presyo sang bugas bisan nga may pagbuhin na sang taripa sa imported.
Natalana nga i-release sang Philippine Statistics Authority (PSA) ang official inflation figures sa Huwebes, Disyembre 5.
