Gin-adoptar sang Kamara ang resolution nga naga-depensa kay House Speaker Ferdinand Martin Romualdez kag sa integridad sang chamber sa tunga sang ila gina-alegar “pagpang-atake” sang Senado.
Na-adoptar ang House Resolution (HR) No. 1562 paagi sa via viva voce ukon voice voting sa plenary session kahapon, Pebrero 5.
Suno sa opisina ni Majority Leader Manuel Jose Dalipe, 286 ka mga mamalidha ang nagpirma sa resolution.
“With its slogan ‘One House, One Voice,’ the House of Representatives stands united in rejecting the unfounded accusations, commits itself to defend the dignity and integrity of the institution, and gives its full and unwavering support to the Speaker,” kabahin sang nakasaad sa resolution.
Pahayag ni Senior Deputy Speaker Aurelio Gonzales Jr. nga amo ang nag-sponsor sang measure, nagakadapat lang nga mag-react ang Kamara kasunod sang gina-alegar paglapas sang Senado sa inter-parliamentary courtesy bangud sa pag-atake kay Romualdez bangud sa alegasyon nga siya ang tawo sa likod sang people’s initiative agud maduso ang charter change ukon ang cha-cha.
Lakip pa sa naghatag sang ila nga manipestasyon sang suporta kay Romualdez amo sanday Camarines Sur 2nd District Rep. LRay Villafuerte nga nagatiglawas sang National Unity Party sa Kamara; Surigao del Norte 2nd District Rep. Robert Ace Barbers nga kabahin sang Nacionalista Party; Palawan 2nd District Rep. Jose Alvarez sang PDP-Laban; San Jose del Monte Rep. Florida Robes sang Partido Federal; TGP party-list Rep. Jose Teves Jr. sang Party-list Coalition; Pangasinan 2nd District Rep. Mark Cojuangco; North Cotabato 3rd District Rep. Ma. Alana Samantha Santos sang Lakas-CMD; kag Camarines Sur 3rd District Rep. Gabriel Bordado Jr. sang Liberal Party.
Lunsay naman nag-abstain sa pagboto ang tatlo ka mga mamalidha gikan sa Makabayan bloc nga amo sanday ACT Teachers Rep. France Castro, Gabriela Rep. Arlene Brosas, kag Kabataan Rep. Raoul Manuel.
Sa manipestasyon ni Brosas, ginsiling sini nga halin sang una, ginapamatukan sang Gabriela Women’s Party ang Charter Change kag indi ini ang dapat nga sapakon sang Kamara kag Senado ilabi na sa tion nga manubo ang sweldo, kulang ang trabaho, kag nagapangkalaak ang presyo sang mga balaklon.
Sa baylo nga charter change, krisis ang mas dapat hatagan sang atensyon suno pa sa natungdan.
Para naman sa Ilonggo congressman nga si Rep. Raoul Manuel, dapat nga indi man pag-uyangan sang tyempo ang charter change kundi ang pag-resolba sang ugat sang mga problema sa pungsod.
Pebrero 1 sang nagpahayag sanday Gonzales kag Dalipe nga maga-file sang resolution ang mga mamalidha sa Kamara agud apinan si Romualdez sa gina-alegar pagpang-atake bangud sa diskusyon sa Charter Change nga gina-angot sa iya.
Nahibaluan nga may word war sa tunga sang Kamara kag Senado bangud sa ginaduso nga constitutional amendments. Sang Enero 23, ang 24 ka mga senador ang nagpirma sa manifesto agud pamatukan ang people’s initiative para sa Cha-Cha. #
