MAASIN, ILOILO – Nagapanguna ang banwa sang Maasin sa bilog nga probinsya sang Iloilo sa may maayo nga performance sa pagpanagtag sang cash assistance sa idalom sang Social Amelioration Program (SAP) sang Department of Social Welfare and Development (DSWD)
Sa interview sang Bombo Radyo kay Maasin Mayor Francis Amboy, iya ginpahayag nga kapin 100% na ang nahatagan sa mga pumuluyo bangud ginatuman sang Local Government Unit (LGU) ang pagsulundan nga dapat mahatag na sa mga benepisyaryo ang ayuda tatlo tubtob pito ka adlaw pagkatapos nga ma-download ang kwarta.
Nakabaton sang tag-P6,000 ang tagsa ka kwalipikado nga benipisyaryo nga apektado sang Enhanced Community Quarantine (ECQ) bangud sang coronavirus disease 2019 (COVID-19) outbreak.
Suno kay Amboy, may dugang pa nga cash assistance nga malauman halin sa Department of Labor and Employment (DOLE) kag sa opisina ni Iloilo Third District Representative Lorenz Defensor.
Sa mga nagareklamo nga wala nakabaton sang ayuda, ginpasalig ni Amboy nga nagapakig-angot siya sa mga Punong Barangay agud ma-validate ang mga ngalan sang pumuluyo kag ginahibalo kun pasado sila sa mga rekisitos.
