ILOILO CITY- Ginakabig sang Local Government Unit sang Tubungan nga tuman ka makaalarma ang natabo nga sunod-sunod nga pinatyanay sa nasambit nga banwa.
Sa interview sang Bombo Radyo kay Mayor Roquito Tacsagon sang Tubungan, Iloilo, iya ginpahayag nga tuman nga naapektuhan ang kalinong sang banwa kag pagsinalayo sang mga pumuluyo bangud sa mga insidente sang patyanay.
Nagpasalig naman si Tacsagon nga masolbar kag mahatagan sang hustisya ang mga biktima.
Pahayag sang alkalde, nagpangayo na ini sang bulig sa Iloilo Provincial Police Office agud mapadasig ang pag-imbestigar kag pagsolbar sa krimen.
Natalana naman nga magpatawag sang pagsinapol ang alkalde upod sa Municipal Peace and Order Council agud istoryahan ang pagplano sang mga tikang agud indi na masundan pa ang serye sang mga krimen nga nagluntad sa amo nga banwa.
Samtang, nagtukod na sang Special Investigation Task Group ang Iloilo Provincial Police Office angot sa kamatayon nanday Barangay Kagawad Harold Tablazon sang Barangay Ago, Tubungan, kag Glen Bunda, 20, Sangguniang Kabataan Chairman sang Barangay Tagpuan, Tubungan.
Sa interview sang Bombo Radyo kay Police Master Sergeant Francisco Lindero, spokesman sang Iloilo Police Provincial Office, iya ginpahayag nga katuyuan sang task group nga makapangita sang mga testigo nga makahatag sang testimoniya angot sa insidente.
Suno kay Lindero, sa subong, isa sa ginalantaw nga anggulo ang posible kaangtanan sang natabo nga ambush sa pagpatay man kay Police Master Sergeant Arnel Paurillo.
