Nagdangat sa 170 ka mga tawo ang ginpangbitay sa Saudi Arabia sang 2023 lakip na ang apat ka mga tawo kadungan sa bisperas sang bag-ong tuig.
Mas mataas ini nga rekord ipaanggid sa 147 ka convicts nga ginpatay sang 2022, apang mas manubo naman ipaanggid sa 187 ka mga executions sa kingdom sang 2019.
Ang apat nga ginbitay sa New Year’s eve ang na-convict bangud sa kaso nga murder. Lakip diri ang duha sa north-western city sang Tabuk, isa sa Riyadh, kag isa sa Jazan sa south-west.
Sa bilog man nga rekord sang 2023, nalakip ang 33 nga gin-akusaran sa krimen nga naangot sa terorismo kag duha ka soldado nga napreso bangud sa pag-traidor sa otoridad.
Sa bulan lamang sang Disyembre, may yara gid sang 38 ka executions.
Kun matandaan, sang 2022, sandig sa data sang Amnesty International, mas madamo nga tawo ang ginpang-execute sa Saudi Arabia ipaanggid sa iban nga mga pungsod magluwas lamang sa China kag Iran.
Kilala ang kingdom sa pagpangpugot sang ulo. Kun matandaan, sang 2022, sa sulod lamang sang isa adlaw, 81 gid ka mga tawo ang ginpang-execute — hitabo nga nakabaton sang wala-tuo nga pagkondenar halin sa iban nga mga pungsod.
Ginakonsiderar naman sang otoridad nga nagaangot ang ila tikang sa sharia law, ang Islamic law code nga naka-base sa pagpanudlo sang Koran. Ginpahayag man nga kinahanglanon ini agud mapabilin ang “public order.”# (with reports from Agence France-Presse)
Alamy Stock Photo
