ILOILO CITY – Indi makapaidalom sa training kag schooling ang pulis nga may yara sang indi normal nga Body Mass Index.
Ini ang kasunod sang pahayag ni Police Lt. Gen. Archie Gamboa, Officer-in-Charge sang Philippine National Police, nga dapat wala sang overweight ukon obese nga pulis agud nga mangin maayo ang ila performance sa trabaho.
Sa interview sang Bombo Radyo kay Police Regional Office 6 Director Police Brigadier General Rene Pamuspusan, iya ginpahayag nga iya nga ginapahanumdom ang tanan nga station commanders nga ang nasambit nga mandu sang OIC PNP chief ang dapat nga sundon.
Sang nagligad nga Disyembre 24, 2019 suno kay Pamuspusan, ginlunsyar sang Police Regional Office 6 ang Biggest Loser (A road to forever healthy) kun sa diin may yara sang nakalinya nga aktibidad agud nga mabuhinan ang Body Mass Index sang mga pulis nga tuman ka tambok.
Sa bahin naman sang Iloilo City Police Office, naglab-ot sa 251 ang overweight samtang 61 naman ang obese nga natunga sa classification nga obese 1, obese 2 kag obese 3.
Santo sa Body Mass Index category, ang underwweight ang may yara sang below 18.5, ang normal ang yara sa 18.5-24.9, overweight ang yara sa 25-29.9 kag ang obese ang may yara sang Body Mass Index nga masobra sa 30.
Nahibalu-an nga ang Body Mass Index ang ginakuha paagi sa weight in kilo divided by height in meters.
