ILOILO CITY – Tunga ang reaksyon sang mga Senior Citizen sa syudad sang Iloilo may kaangtanan sa pagpadayon sang programa nga Free Movie.
Sa interview sang Bombo Radyo kay Alfredo Entripedo, 79, retired jail warden, iya ginpahayag nga pabor siya sa nasambit nga programa apang mas makapaayo kun educational ukon documentary ang ipalantaw sa mga Senior Citizen.
Suno kay Entripedo, sang una, wala siya sang may nalantaw nga Free Movie bangud nga wala gid sang may nagsanto sa iya naluyagan.
Sa pihak sini, ginpahayag sang natungdan nga maayo ang ginaduso sang Iloilo City Government para nga makaliwa-liwa man ang mga Senior Citizen sa tagsa ka Martes nga adlaw.
Samtang, para naman kay Pacita Pinuela, 69, vegetable vendor, first time niya nga maka-avail sang Free Movie nga ginatanyag sang Iloilo City Government.
Suno kay Pinuela, iya gid nga ginapasalamatan ang Free Movie para sa ila nga mga Senior Citizen kag wala man siya sang pili kun pelikula ang pagahambalan.
Sa pihak sini, indi naman pabor ang 69 anyos nga Chichirya vendor nga si Erlinda Flores, sa Free Movie para sa mga Senior Citizen.
Sa pagpaathag ni Flores, ang tion nga iya iusik sa paglantaw sang pelikula sa senihan ang iya na lang nga ibaligya sang chichirya agud nga may yara sang panggasto sa pagpa-eskwela sang iya mga apo kag agud nga may yara man sang inuggasto sa pang adlaw-adlaw.
Magluwas diri suno kay Flores, natamaran siya nga magpadulong sa senihan bangud nga wala siya sang mahimo nga updon.
