ILOILO CITY – “Mas nangin priority naton ang comfort sangsa safety.”
Ini ang pahayag ni Iloilo City Public Safety and Tranportation Management Office (PSTMO) Head Mr. Jeck Conlu, nga nagapatuhoy sa mga commutters sa syudad nga ‘nagapagusto’ lang sa pagtabok kag wala nagapati sa traffic rules and regulations.
Sa interview sang Bombo Radyo kay Conlu, iya ginpahayag nga nangin kaangay na sa ‘door-to-door’ ang kultura nga ginasunod sang mga pasahero nga nagatabok lang kun diin sila makasaho kag wala na nagapadulong sa mga pedestrian lanes.
“That is why ang mga programa naton wala lang naga-focus sa mga motorista kundi sa mga loading and unloading area– kinahanglan naton tudluan ang pasahero sang disiplina,” pahayag ni Conlu.
Isa sa programa nga mabaskog nga ginaduso sang Iloilo City Government amo ang Street Discipline nga iga-implementar sa masunod nga tuig.
Sa idalom sang Street Discipline, hugot nga ipatuman ang mga pagsulundan sa trapiko — national laws kag local ordinance — ilabi na sa Sen. Benigno Aquino Jr. Avenue ukon ‘Diversion Road’ sa distrito sang Mandurrio.
Lakip sa mga pagsulundan amo ang Anti-Modified Muffler Law, Anti-Drunk/Drugged Driving Act, Anti-Distracted Driving Act, speed limit kag iban pa.
Suno kay Conlu, may iga-deploy ang apat ka opisina — Land Transportation Office (LTO), Highway Patrol Group (HPG), Philippine National Police (PNP), kag PSTMO– nga mga personnel agud bantayan ang mga motorista kag pasahero.
Ipatuman ang street discipline sa 14-km stretch sa Sen. Benigno Aquino Jr. Avenue halin sa Ungka Terminal tubtob sa Esplanade 1, nga nagalakip sa bike lanes, side walks, kag service road.
“Lain gid kon uniformed personnels sang national government ang makit-an nga ara sa area kay matahap ang mga tawo,” dugang pa ni Conlu.
Suno sa iya, maga-deploy ang PSTMO sang 50 ka mga personnel, apang indi pa niya matumod ang ipadala nga mga tinawo sang LTO, HPG, kag PNP.
Nahibaluan nga una nga ginpahayag ni Iloilo City Mayor Jerry Treñas nga ang street discipline, nga ginalauman nga masunod nga iga-implementar sa McArthur Drive, Tabuc Suba, Jaro, ang inisyatibo sang Iloilo City Government agud indi mangin kaangay sang iban nga syudad nga tuman ka gutok ang mga salakyan kag mabudlay ang kontrol sa trapiko.
