ILOILO CITY- Padayon pa nga ginaremedyuhan ang oil spill gikan sa barko sang PNP Maritime Group nga nagtakilid kag nagkapan sa Iloilo River sa Muelle Loney, Iloilo City Proper.
Sa interview sang Bombo Radyo Iloilo kay Police Colonel Greg Togonon, chief sang Regional Maritime Command, iya ginpahayag nga madugay na nga naka-dock ang barko sa Iloilo River.
Suno sa iya, mahimo nga bangud sa pagbubo sang ulan kagab-i, napuno ini sang tubig kag nag-amat-amat lugdang.
Pahayag niya, gin-auction na ini sang PNP kag may iban na nga nagapanag-iya sang amo nga barko nga makabig beyond economical repair ukon indi na makaayo pa.
Gilayon naman nga nagbutang sang spill boom ang Philippine Coast Guard agud indi na maglapta sa Iloilo River ang langis.
Pila sa mga residente ang nagreklamo sa baho gikan sa oil spill.
Nabalaka man ang mga lokal nga opisyal sa epekto sang oil spill sa Iloilo River.
Nagbulig man ang iban nga grupo para mapauntat ang paglapta sang oil spill.
